पैशाच्या वादातून सेवानिवृत्त केंद्र प्रमुखाची हत्या
सावली प्रतिनिधी रोशन बोरकर
मुल : दिनांक २७/०९/२०२५ मुल एम आय डी सी – टेकाडी मार्गावर सेवा निवृत्त केंद्र प्रमुखाचा मृतदेह आढळला, घातपाताची शक्यता असल्याचे मुल पोलिसांच्या तपासात आढळून आल्याने संशयित व्यक्तीला ताब्यात घेऊन झडती घेतली असता हत्या केल्याची कबुली किस्मत मोहम्मद अली सय्यद यांनी दिली असून पुढील तपास सुरू आहे.
मुल तालुक्यातील टेकाडी येथील सेवानिवृत्त केंद्र प्रमुख सुनील कालिदास गेडाम वय ६० वर्ष असे मृतकाचे नाव आहे. तर टेकाडी येथील आरोपी किस्मत मोहम्मद अली सय्यद वय २४ वर्ष, शुक्रवार दिनांक २६/०९/२०२५ ला सायंकाळी ७ वाजता दोघेही सावली मार्गावरील रानसंपन्न हॉटेल येथे जेवण करून एम आय डी सी मार्गाने मुलला परत जातांना आरोपी किस्मत अली याने उसने घेतलेले पैसे देण्यास नकार देत असल्याच्या कारणावरून काही मित्रांच्या मदतीने सुनील गेडाम यांच्या डोक्यावर लोखंडी सळाखिने वार करून हत्या करून पुरावा नष्ट करण्यासाठी मारेगाव – टेकाडी मार्गावरील नाल्यात मृतदेह फेकून दिला.
याच दरम्यान सुनील गेडाम उशीर होऊनही घरी परत न आल्याने कुटुंबीयांनी शोध घेतला, सुनील गेडाम यांना घरून बोलावून नेणाऱ्या किस्मत अली याच्यावर शंका आल्याने मुलगा पंकज गेडाम यांनी पोलिस स्टेशन मुल येथे हरवल्याची तक्रार दाखल केली. दरम्यान आकापुर जवळील वळण मार्गावर सुनील गेडाम यांची पल्सर गाडी, मोबाईल, चश्मा आणि चप्पल दिसत असल्याची माहिती पोलिसांना मिळाली.
मुल पोलिसांनी संशयित म्हणून किस्मत अली याला ताब्यात घेऊन चौकशी केली असता उसने घेतलेले सहा लाख रुपये देण्यास नकार दिल्याच्या वादातून जीव मारल्याची कबुली देऊन प्रेत लपविल्याचे ठिकाण पोलिसांना सांगितले. घटनेतील आरोपी याचा गुरे खरेदी विक्रीचा व्यवसाय असल्याने सदर प्रकरणात पुन्हा काही जणांचा सहभाग असल्याचे बोलल्या जात आहे पुढील तपास पोलीस स्टेशन मुल करीत आहे.
